feb
13
mån
Viser og slikt – ein poesikonsert @ Førde bibliotek
feb 13@19:00-20:30

Måndag 13. februar markerer vi at meirope bibliotek på Førde bibliotek er oppe og går og vi inviterer til ein triveleg kveld med poetisk konsert!

Du får litt informasjon om kva meirope bibliotek betyr for deg som bibliotekbrukar og du kan oppgradere lånekortet ditt til eit nøkkelkort og få tilgang til biblioteket etter ordinær opningstid.

Så vert det konsert; “Viser og slikt”, med Helge Johnsen, Ove Mjåtveit og gjestemusikar Ivar Brukvik Sætre.

Ein poetisk kveld med viser og slikt
Livet som alltid er i endring, kjærleikens årstider, det vestlandsblå vemodet og humoren som kastar solskinet sitt ned i sinnets djupe fjordar. Dette er stikkord for songane og poesien Helge Johnsen og bassisten Ove Mjåtveit har med seg i konserten «Viser og slikt» på Førde bibliotek. Samarbeidet mellom dei to tok til sist sommar og konserten dei då heldt vart så godt motteken at dei bestemte seg for å halde fram. Seinare har dei spelt ei rekkje andre stadar, med god respons også der. Denne gongen har dei med seg ein del nye songar og dikt, og utvidar lydbiletet med ein gjestemusikar, gitaristen Ivar Bruvik Sætre.

Helge Johnsen var aktiv under den store norske visebølga på 1970-talet, men let songane og poesien sin leve sitt stille liv til husbruk og i gode veners lag, i dei meir enn førti åra han var journalist i m.a. Firda. No er han ute av presseyrket, har hatt ei varm gjenforeining med lyrikken og gitaren, og deler igjen denne sida av den skapande aktiviteten sin med eit publikum.

Ove Mjåtveit spelte gitar i danseband i ungdomstida på 70- og 80-talet, men melde overgang til kontrabass som førtiåring. Han er musikalsk altetande, spelar symfonimusikk, jazz, pluss tango- og balkanrytmer i gruppa «Bellatango» – og har no også teke kontrabassen sin med seg inn i visesjangeren.

Ivar Bruvik Sætre tok til å spele gitar som 13-åring. Han meistrar ulike sjangerar, som jazz og String Swing-stilen Django Reinhardt i si tid gjorde kjend. Mest går det i rock og blues, med nokre jazzstunder innimellom. I samarbeidet med Helge og Ove spelar han melodisk, akustisk visegitar.

Helge Johnsen, Ove Mjåtveit og Ivar Bruvik Sætre øver til konsert på Førde bibliotek.

feb
15
ons
Barnebok-kveld – Barnelitterære brannøvingar  @ Festsalen, Førdehuset
feb 15@19:30-21:00

Dei gode barnebøkene kan vere både brannøvingar og soloppganger gjennom barndommen. Korleis kan vi som er vaksne mellom boka og barnet, legge til rette for at bøkene får spele viktige roller i oppveksten til ungane?

Onsdag 15. februar kl. 19.30 vil forfattarane Brynjulf Jung Tjønn og Ingrid Z. Aannestad samtale om å skrive fram vesentlege bodskapar for dei minste lesarane, med utgangspunkt i biletbøkene «Gard er ikkje redd» og «Berre mor og Ellinor». Journalist Erlend Oldeide leier samtalen og litteraturformidler Janne Karin Støylen innleier om korleis høgtlesinga kan opne for viktige samtalar mellom den vesle som lyttar og den vaksne som les. Ei bokutstilling utforskar temaet ytterlegare i biblioteket.

Det vert høve til å kjøpe signerte eksemplar av dei to forfattarane sine barnebøker, som begge er skrivne på nynorsk. I Festsalen byr vi på kaffi, te og litt å bite i, med god tid til prat og erfaringsdeling etter programmet.

Ope for alle. Gratis arrangement.
I samarbeid med Førde bibliotek i Sunnfjord og skule og oppvekst i Sunnfjord kommune. 

feb
24
fre
Gotisk lesegruppe @ Førde bibliotek
feb 24@12:00-14:00
Fredag 24. februar  kl. 12.00 er vi attende med lesegruppa for gotisk skrift på biblioteket ved Yngve Nedrebø, statsarkivar i Bergen og fagdirektør for skriftforvaltning i Arkivverket.
Tema varierer frå samling til samling.
Gruppa passar for alle som arbeider med lokalhistorie og slektshistorie, og som slit med å lese dokument med gotisk skrift.
Samlinga varer denne gongen 2 timar, Yngve er med oss digitalt og det er begrensa plass.
Ta kontakt med Førde bibliotek på epost for påmelding: bibliotek@sunnfjord.kommune.no eller telefon 57721909 for påmelding og få skriftmateriale på førehand.

Ved å halde fram med å bruke denne nettstaden, gir du samtykke til vår bruk av informasjonskapslar (cookies). Meir informasjon

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close